Ástarbréf til ríkisstjórnarinnar og bankanna.......

Elsku ríkisstjórn, bankar og önnur fjármögnunarfyrirtæki

Meðan bankarnir standa stútfullir af fé/eignum og hinn almenni borgari er blóðmjólkaður til hinsta dropa neitar ríkisstjórnin að leiðrétta stökkbreytt lán almennings. Þó svo Jóhanna lýsi því yfir að kanna eigi svigrúm bankanna þá segir það mér ekkert um neina leiðréttingu. Verðbólgan mallar. 

Elsku ríkisstjórn.

Ekki veit ég hverra hagsmuna þið gætið. Ekki okkar almennings, það er klárt.

Elsku bankar og önnur fjármögnunarfyrirtæki.

Persónulega gef ég fullkomið frat í ofvaxin lán sem þið kunnið að eiga. Endilega gangið að eignum mínum (fyrrum) bæði sem lántakanda og veðlánanda. Upprunalega lánið mitt, fyrir forsendubrest var alveg eitthvað sem ég gat tæklað. Í dag - nei. Veðið sem ég lánaði fyrri maka og ekkert er gert í að færa af eigninni, get ég ekki tæklað. Og haldiði að ég ætli að reyna það? 

Nei

Þið getið átt það sjálfir.

Elsku fjármögnunarfyrirtæki.

Haldið þið að ég muni koma til með að borga skuld af bíl sem á ekki einu sinni að vera skráður á mig? Löngu seldur í þokkabót? Glætan í þriðja veldi.

Það krúttlega við allar ofangreindar skuldir sem fæstar eru á mínu nafni en hanga á íbúð sem eitt sinn var mín, er að allar eru þær verðtryggðar. Þær lifa sínu eigin lífi í takt við getuleysi ríkisstjórnarinnar.

Elsku bankar og fjármögnunarfyrirtæki.

Miðað við stöðu skuldanna í dag þætti mér gaman að sjá ykkur rífast um litlu íbúðina sem á að halda þeim á floti. Og er amk tvöfallt minna virði en skuldin. Endilega setjið mig í gjaldþrot. En ekki ætla ég að borga fyrir það.

Það má alltaf dúndra enn einni eigninni á efnahagsreikninginn ykkar. Þar sem hún situr og gerir ekkert gagn. Ég vara ykkur við. Húsið þarfnast viðgerðar, gólfin eru hálf ónýt og rafmagnið á síðasta snúningi. Gamlar innréttingar - já gamalt hús. 

Ég er að hugsa um að snúa mér alfarið að því að njóta barnanna minna og hætta að hafa áhyggjur af því hvernig þið ráðstafið þessu lítilræði sem eitt sinn var mitt.

Þau eru mér nefninlega mun kærari. Líf mitt er mun meira virði en svo að ég ætli að dragnast með svona skuldir inn í framtíðina.

Ég gef skít í ykkur.

Ég á mér nefninlega líf.

Að lokum er hér mjög góð grein fyrir lántakendur. Megi bankarnir skjálfa fyrir mér.

http://www.heimilin.is/varnarthing/images/stories/med_greinum/dv_rad_til_lanthega.jpg

 

Bankar neyddir til að þiggja aðstoð

Athugasemdir

[Óskar Helgi Helgason (IP-tala skráð) 14.10.2011 kl. 16:45]

Heil og sæl Lísa Björk; æfinlega !

Það vill svo til; að þú ÁTT þína íbúð, skuldlausa.

Búin að greiða hana; 8 - 10 falt, Lísa mín, og láttu ekki blekkjast, af hótunum ÞJÓFA bæla Stjórnarráðs, og svokallaðs Banka kerfis.

Stattu keik; á þínu - allt til enda.

Hins vegar; er komið að landsmönnum, að grípa til vopna, eigi ekki öllu verr að fara, úr því, sem komið er.

Með beztu kveðjum; úr Árnesþingi - sem jafnan /

Óskar Helgi Helgason 

[Lísa Björk Ingólfsdóttir, 14.10.2011 kl. 18:59]

Sæll Óskar.

Ávalt hressandi að heyra frá þér. Ég mun halda ótrauð að halda áfram að berjast fyrir réttlæti. Ef það tekst ekki fyrir mig, þá annarra.

En persónulega kýs ég að fara frekar á núlli inn í framtíðina en með skuldir sem í fyrsta lagi eru ekki allar mínar og í öðru lagi stökkbreyttar langt umfram íbúðarverð. Skil ekki í því að fólk berjist við lán sem eru umfram markaðsverð, megandi vita það að markaðsverð mun á endanum lækka meðan lánin halda áfram að hækka. Ef ríkisstjórnin gerir ekki neitt, sem hún er ekki að gera.

Skil ekki hvernig fólk getur látið bjóða sér að borga af lánum sem eru yfir markaðsverði. Bankarnir færu í vitleysu ef fólk mundi bara hætta að láta undan kröfum þeirra. Það er mitt mat.

[Steingrímur Helgason, 14.10.2011 kl. 22:39]

Znilldarfærzla, zkútan mín & ekki zkemmir znörp zkoðun Zkara...