Ég áttaði mig á svolitlu alveg stórskemmtilegu!

Það heitir Þjóðarsálin.

Veit ekki af hverju ég hef ekki dottið niður á þetta fyrr.

En núna er ég komin með harðsperrur í kjálkana af hlátri, líkt og þegar ég kom af Hellisbúanum hérna um árið.

http://kermit.blog.is/blog/kermit/entry/950737/

Þetta er bara fyndið!

Vilja Þráin aftur

Ef þetta segir ekki allt sem segja þarf!

Hér má sjá hvernig nýkjörin (og fyrrverandi) stjórn leysir úr deilum. Með því að binda deiluefnin í lög. Nú geta þau (hin sömu og sögðu sig úr stjórn, hreyfingunni, settu saman lög og buðu sig fram aftur) miðstýrt þingflokknum eins og strengjabrúðum. Ef þau ekki "verða til friðs" geta þau, ásamt fámennum félagsfundi (sem þau eru oft stærri hlutinn af) lýst yfir þau vantrausti eða hvað sem helst.

Sjá nánar í fyrri bloggfærslu minni um þessi deilumál milli stjórnar til þingmanna.

http://wonderwoman.blog.is/admin/blog/?entry_id=948070

Lýðræði er í sjálfu sér ágætt sem slíkt, en það má einnig misnota það. Og þessi Landsfundur var ekkert annað en misnotkun á lýðræði.

Ég styð Birgittu, Margréti og Þór heilshugar. Hér fer gott fólk sem hefur þurft að þola mikið frá sínum félagsmönnum, en staðið sig samt ótrúlega vel. Framundan er að taka fyrir á þingi (vonandi) vanda heimilanna og annað sem þau hafa á stefnuskrá SINNI.

Og ég treysti þeim til að gera það með sóma!

Skrifi undir heit en ekki eið

Auðvelt að leysa úr ágreiningsefnum ef þau eru ekki til staðar.

Margir spyrja sig nú þeirra ágengu spurningar - hvað verður um Borgarahreyfinguna?  Verður klofningur milli þingflokks og hreyfingar?

Margir þeir sem utan við standa horfa til baka í gömlu fræðin og telja óhugsandi að farsælt áframhald geti orðið við  slíkan klofning. Ég get hinsvegar ekki verið sammála.

Annarsvegar höfum við hörkuduglega þingmenn sem hafa staðið sig með prýði og sóma á nýafstöðnu sumarþingi. Vissulega kom upp ágreiningur vegna ESB málsins - en allir flokkar aðrir voru einni klofnir í afstöðu sinni til þessa málefnis. Þeir höfðu hinsvegar reynslu og þroska til að láta það ekki eyðileggja flokka sína innanfrá. Enda hafa ekki verið háværar innanhússdeilur um málefnið á bloggsíðum annarra flokka hvað varðar þetta málefni.

Það vita allir að á erfiðum tímum þurfa þingmenn sterkt bakland. Bakland sem styður þá í oft erfiðri upplýstri ákvarðanatöku. Til þess er nauðsynlegt að baklandi sé tilbúið til að sýna sveigjanleika og gefa eftir ef svo ber við. Við skulum ekki gleyma því að stór baráttumál á stefnu Borgarahreyfingarinnar hafa enn ekki komið til umræðu innan þings. Ég er hinsvegar viss um að þingmenn Borgarahreyfingarinnar vinna áfram í þágu fólksins í landinu að málefnum heimilanna svo eitthvað sé nefnt - og síðan öðru því sem á þeirra stefnuskrá er.

Nú vill svo til að ég hef fylgst með þeim deilum sem nýkjörinn formaður stjórnar BH talar um.  Þessar deilur snérust fyrst og fremst að þingmönnum vegna ESB afstöðu en gerðust bara illvígari með tímanum innan stjórnar og fámennrar virkrar grasrótar. Þeir sem deildu hvað harðast sitja nú í stjórn - aftur - eftir að hafa sagt af sér, sagt sig úr hreyfingunni, komið inn aftur og boðið sig fram til stjórnar. Í skjóli nýrra samþykkta sem að mestu voru unnar af þeim sjálfum og innihalda stíf atriði um aðkomu þingflokks að málum og miðstýringu frá stjórn.

Þingmenn allir (utan Þráins sem þá þegar var horfin frá darraðadansinum) sátu sáttafundi um samstöðu hreyfingarinnar. Allt kom fyrir ekki - ákveðin valdabarátta var hafin og henni var ekki hnikað. Þegar tillögur voru kynntar og ljóst var að þær innihéldu óvægin atriði, stífa miðstjórn og jafnvel brot á stjórnarskrá, sá þingflokkur sér ekki annarra kosta völ en að kalla til meðal annars utanaðkomandi ráðgjafa til að semja nýjar tillögur út frá fyrri tillögum. Þetta var vissulega leið til sátta enda voru í tillögunum leiðir til að styðja við grasrót og taka virkilega á þeirri vinnu sem framundan var.

Það sem var kannski ólíkt með tillögunum var að ofurvald stjórnar og stýring var dempruð verulega og settur inn framkvæmdastjórni sem nokkurskonar miðstýring, þó án valda. Vissulega hefði verið betra að útfæra margt betur og hafa virka miðstjórn, en til þess vannst ekki tími.

Ég mætti síðan á Landsfund sem áhorfandi, því ég hef ekki skráð mig í hreyfinguna og datt ekki til hugar að gera það 5 mín. í landsfund bara til að notfæra mér atkvæðisrétt. Á landsfundi varð ég vitni að aðförum meðlima hreyfingarinnar úr pontu sem ég vil ekki hafa orð um. Flestir voru þetta frambjóðendur til nýrrar stjórnar og þeir sem hæst höfðu látið óánægjuraddir dynja í fjölmiðlum og á bloggsíðum. Tillögur þingmanna sem og sáttaleið voru teknar af lífi, bæði úr pontu og sem og í kosningum. Háværar voru raddir um að allt sumarið hefði tekið í að vinna að þessum tillögum og það væri lítilsvirðing að koma með aðrar þó svo þær væru unnar af m.a. fólki utan hreyfingar til álitsgjafar. Innihald þeirra var lítið rætt - enda var aldrei ætlunin að láta af valdabaráttunni og leita sátta.

Eðlilega er stjórn sátt við sitt framlag og á væntanlega auðvelt með að leggja deilur til hliðar, enda hefur stjórn og virkur hluti grasrótar unnið eigin baráttu og engan til að deila við lengur. Með þessu útspili er ljóst að bakland þingmanna er ekki bakland þingmanna heldur eiga þeir að hoppa eins og miðstýrðar strengjabrúður og bíða leyfis stjórnar til að segja svart eða hvítt. Sennilega verða þau einnig látin vinna drengskaparheit samkvæmt lið 11.2.1 sem hreinlega stangast á við stjórnarskrá.

Er þetta það sem við viljum sjá til handa þessum einstaklingum sem hafa staðið sig eins og hetjur? Hvar eru raddir þeirra sem telja þau hafa unnið góð störf á þinginu? Hvernig væri að sá hópur færi að stíga fram. Því þessi ágæti þinghópur þarf bakland líkt og aðrir þinghópar. Bakland sem styður við bakið á þeim.

Ég trúi á þau!

Þór, Margrét og Birgitta - þið hafið barist eins og hetjur. Ekki hætta því!

Harma deilur í Borgarahreyfingunni

Úgala búgala vandamál!

Hugsið ykkur ef endur hefðu ekki vængi - það væri vandamál.

Hugsið ykkur ef fólk hefði ekki skoðanir - það væri vandamál.

En að setja þær umbúðalaust á netið - það getur skapað vandamál.

En til þess höfum við gagnrýna hugsun. Til að filtera út svona vandamál. Hrista kjarnann frá hisminu eða einfaldlega álykta um það að sumt sé ekki þess virði að lesa. Hvað þá gagnrýna. Eða muna eftir. Eða.....

Hugsið ykkur ef ég held nú áfram þessari færslu í stað þess að hendast á koddann - það væri vandamál.

Því þá verð ég svo syfjuð þegar klukkan hringir.............

Sérkennilegur Landsfundur!

 

Minn fyrsti landsfundur var vissulega öðruvísi en ég átti von á. Í skýrslu þingmanna kom fram ekki bara hverju þeir hafa áorkað á sl. sumri (sem er ekki svo lítið) heldur hvernig þeim hefur liðið með rýting í bakið frá félagsmönnum sínum.

5 mín. í kjör um ný lög fylltist salurinn (A meginn) en tæmdist strax aftur eftir að kosningu lauk. Þó gáfu sumir sér tíma til að fá sér súpu enda heyrðist mér einhver segja, "fyrst ég er nú búin að draga þig hingað villtu þá ekki fá þér súpu".  Einnig ákváðu einhverjir unglingar foreldra 12 manna hóps að kíkja við á þessum tímapunkti. Ekkert af þessu mátti sjá B megin salarins. Afhentir seðlar í kjöri voru 90 en inn komu 91. Allt mjög furðulegt. En að sjálfsögðu urðu A tillögur ofaná. Og auðvitað var þetta allt mjög lýðræðislegt.

Þeir sem höfðu setið fundinn frá upphafi, sem og B megin sátu áfram þar til útséð var að ákveðinn 12 manna hópur og stuðningsmenn hefðu með þessum framgangi breytt hreyfingunni í flokk með því sem einhver kallaði fasistalög og vísa þá til t.d. greinar 11.2.1 ef ég man rétt (þar sem þingmenn eiga að sverja eið.....) ásamt fleiru.

Þegar kom að stjórnarkosningum um sömu stjórn og setið hafði fyrir aukalandsfund og nú með (eftir breytingartillögu) ótakmarkaðan árafjölda í stjórnarsetu, yfirgáfu stuðningsmenn tillögu B salinn og settust fyrir utan. Greinilegt var að einstefna væri í sáttavilja.

Mig langar líka til að segja frá því að 39% studdu tillögu B. Þessi 39% sátu fundinn frá 9:00 og fram að stjórnarkosningum. 59% studdu tillögu A, en af þeim voru kannski 29% á fundinum frá upphafi og eftir að kosningu lauk. Restin sat hjá - og sat að mestu áfram. Dæmi hver sem vill.

Að lokum - fundurinn var hljóðritaður. Þetta með afhenta og innkomna kjörseðla kemur fram á þeim upptökum, sem og má sjá mætingu fólks á myndupptökum ef einhver hefur áhuga á að rengja orð mín.

Til hamingju nýkjörin að mestu gamla stjórn - og gangi ykkur vel.

Átök innan Borgarahreyfingarinnar

Frá málefnahópum hreyfingarinnar inná þing.

Við undirrituð teljum að meðfylgjandi tillögur að samþykktum fyrir Borgarahreyfinguna
muni tryggja að hreyfingin starfi áfram á þeim grunni sem að hún lagði af stað með,
að hún sé hreyfing en ekki stjórnmálaflokkur.
Við teljum að þessar grasrótarsamþykktir muni tryggja að svo verði, meðan að tillögur
að þeim flokksamþykktum, sem einnig hafa verið lagðar fram, geri hreyfinguna að
tiltölulega hefðbundnum stjórnmálaflokki.”

Baldvin Björgvinsson
Baldvin Jónsson
Birgitta Jónsdóttir
Daði Ingólfsson
Gunnar Waage
Högni Sigurjónsson
Jóhann Ágúst Hansen
Katrín Snæhólm
Lísa Björk Ingólfsdóttir
Margrét Rósa Sigurðardóttir
Margrét Tryggvadóttir
Rakel Sigurgeirsdóttir
Sigurlaug  Ragnarsdóttir
Þór Saari

 __________________________________________________________________________ 

Ég er stolt af framtaki þessu í þágu Borgarahreyfingarinnar sem á að stuðla að því að efla hana sem þá grasrótarhreyfingu sem henni var ætlað að vera. Hreyfingu fyrir þjóðina þar sem allir geta tekið þátt í málefnavinnu og fá til þess stuðning framkvæmdastjóra. Samkvæmt samþykktum þessum er þinghópurinn síðan í tengslum við málefnahópa sem vinna að þeim málefnum sem tekin eru fyrir á þingi. Með þessu móti eru boðleiðir eins beinar og opnar og hugsast getur.

Þetta eru lýðræðislegar samþykktir sem stuðla að því að reyna til hins ýtrasta að ná samhljóm í málum og málefnum, virkja og efla grasrótina og jafnframt koma í veg fyrir ákveðna miðstýringu.

Einnig er ákvæði þess efnis að þingmenn og fyrstu varaþingmenn séu ekki kjörnir í stjórn. Þar er sleginn ákveðinn varnagli á að þingmenn og varaþingmenn geti notað atkvæðisrétt sinn í stjórn hreyfingarinnar í eigin þágu fremur en af heilindum gagnvart Borgarahreyfingunni og þjóðinni sem heild.

Ég hvet alla til að skoða tillögurnar vel fyrir landsfundinn.

Megi Borgarahreyfingin eiga góðan landsfund.

Félagið heitir Borgarahreyfingin og er starfsvæði þess Ísland. Heimili Borgarahreyfingarinnar og varnarþing er í Reykjavík.

Borgarahreyfingin skal lúta lögum nr. 162/2006 um fjármál stjórnmálasamtaka og frambjóðenda og
um upplýsingaskyldu þeirra. Öll fjármál hreyfingarinnar skulu vera opinber og aðgengileg almenningi.

Markmið
1. Markmið Borgarahreyfingarinnar er að koma málefnum fyrirliggjandi stefnuskráar sinnar í
framkvæmd og hún skal leggja sig niður og hætta störfum þegar markmiðunum hefur verið náð eða
augljóst er að þeim verði ekki náð. Þessari grein má einungis breyta með einróma samþykki
landsfundar.

2. Aukamarkmið hreyfingarinnar er að hjálpa grasrótarhreyfingum á Íslandi að koma sínum
sjónarmiðum á framfæri.

3. Hreyfingin býður fram til alþingiskosninga til að ná fram markmiðum sínum.

Skipulag
Framkvæmdastjóri
1. Þegar fjárráð leyfa skal hreyfingin ráða framkvæmdastjóra. Verksvið hans verður:
• að starfa með grasrótarhreyfingum á Íslandi og hjálpa þeim að koma boðskap sínum á
framfæri:
o við þingmenn Borgarahreyfingarinnar.
o við þingmenn annarra stjórnmálaafla.
o við aðra grasrótarhópa.
o við stofnanir og fyrirtæki eftir því sem þurfa þykir.
o við almenning í gegnum fjölmiðla og rafræna miðla.
• að auðvelda grasrótarhópum starfsemi sína með því að útvega fundaraðstöðu og annað sem
þarf og er á færi hreyfingarinnar auk þess að miðla reynslu annarra hópa
• að halda utan um hópa sem vilja starfa fyrir hreyfinguna á einn eða annan hátt
• að sjá um fjármál hreyfingarinnar, bæði uppgjör og áætlanir
• að skipuleggja atburði sem tengjast stefnumálum hreyfingarinnar s.s:
o auglýsa eftir framboðum á vegum hreyfingarinnar til nýrra alþingiskosninga ef þurfa
þykir.
o skipuleggja árlegan opinn landsfund hreyfingarinnar.
o aðrir atburðir.

2. Framkvæmdastjóri skal ráðinn á faglegum forsendum ofannefndrar verksviðslýsingar af einni af
þremur stærstu ráðningarstofum landsins hverju sinni er best býður í verkið. Önnur ráðningastofa eða
fagaðili skal meta störf framkvæmdastjóra á hálfs árs fresti eða þegar stjórn hreyfingarinnar óskar
sérstaklega eftir því.

3. Framkvæmdastjóri hefur yfirsýn yfir hópa sem starfa undir nafni hreyfingarinnar og skal halda
opnum samskiptaleiðum við þá, þ.m.t. póstlista.

4. Ekki skal haldið sérstaklega utan um félagaskrá Borgarahreyfingarinnar.

5. Framkvæmdastjóri hefur ekki atkvæðisrétt í neinu máli sem kosið er um á vegum hreyfingarinnar
og skal ekki hafa frumkvæði að stofnun hópa innan hennar. Framkvæmdastjóri skal einnig leitast við
að vera hlutlaus í öllum málum.

6. Framkvæmdastjóri ber ábyrgð á daglegu starfi og fjármálum hreyfingarinnar og er talsmaður
hennar.

Stjórn
1. Stjórn hreyfingarinnar skal mynduð af fjórum aðalmönnum auk fjögurra varamanna. Aðalmenn og
varamenn sitja í tvö ár í senn. Tveir nýir aðalmenn og tveir nýir varamenn skulu kosnir í stjórn ár
hvert. Stjórnarmenn skiptast á að bera titlana formaður, ritari og gjaldkeri, þrjá mánuði hver.
Á fyrsta kjörtímabili stjórnar skulu fjórir aðalmenn og fjórir varamenn kosnir, en þeir tveir
aðalstjórnarmanna með fæst atkvæði á bak við sig skulu víkja að ári liðnu og varamenn taka þeirra
stað.

Þingmenn og fyrstu varaþingmenn skulu ekki taka þátt í kjöri til stjórnar. Nú nær stjórnarmaður kjöri
til þingmennsku þá skal varamaður taka sæti hans.

Að auki skal stjórnin skipuð einum úr þingmannahópi hreyfingarinnar sem skal skipta inn jafnt innan
hvers árs milli þingmanna eftir stafrófsröð. Þingmaður er alltaf almennur stjórnarmaður en ekki ritari,
gjaldkeri eða formaður.

2. Stjórnin skal hittast minnst einu sinni í mánuði, einungis til að meta störf framkvæmdastjóra og, ef
tilefni er til, óska eftir mati á störfum hans af óháðum, faglegum aðila, sem ekki skal vera
ráðningarfyrirtækið sem réði hann upphaflega. Ef matsaðilinn metur framkvæmdastjórann óhæfan til
að starfa áfram skal honum sagt upp og nýr framkvæmdastjóri ráðinn í hans stað á sama hátt og áður er getið.

3. Stjórnin skal leitast við eftir fremsta megni að vera sammála í niðurstöðum sínum. Náist ekki
samstaða um mál skal því frestað til næsta stjórnarfundar. Ef ekki næst samstaða á þriðja fundi skal
nefndin greiða atkvæði um ágreiningsmálið.

4. Stjórn skal bera ábyrgð á fjárreiðum Borgarahreyfingarinnar, skuldbindingum hennar og fullnustu
þeirra.

5. Ekki skal fela öðrum en framkvæmdastjóra ábyrgð á fjárreiðum eða rekstri hreyfingarinnar.

6. Til að ákvarðanir stjórnarfundar séu lögmætar skulu að lágmarki 3/5 hluti stjórnar sitja fundinn.
Fundargerðir stjórnarfunda, þar með talið fundir stjórnar og þinghóps, skal birta á Netinu strax að
fundi loknum og athugasemdir við þær skulu vera opinberar.

7. Stjórnin skal gæta trúnaðar gagnvart hreyfingunni í störfum sínum.

8. Stjórnarmönnum er heimilt að gegna stjórnarsetu í mesta lagi tvö ár samfellt, með tveggja ára hléi
þar á eftir. Enginn skal sitja í stjórn lengur en samtals fjögur ár. Stjórnarseta skal vera launalaust sjálfboðastarf án nokkurra fríðinda. Ferðakostnaður stjórnarmanna utan höfuðborgarsvæðisins skal
greiddur af hreyfingunni.

Nefndir
1. Landsfundarnefnd er eina fasta nefnd hreyfingarinnar. Öllum er heimilt að taka þátt í henni.
Landsfundarnefnd skal vinna með framkvæmdastjóra að skipulagningu landsfundar.

2. Aðrir sem vilja starfa að þeim málefnum hreyfingarinnar sem koma fram í stefnuskrá eða aðstoða
við innra starf eða málefnavinnu geta myndað hópa innan hennar og skulu njóta stuðnings
framkvæmdastjóra við störf sín.

3. Hópar, eða meðlimir hópa tengdir hreyfingunni eru ekki talsmenn hennar, en er það eitt skylt að
upplýsa framkvæmdastjóra um framgang hópanna eftir bestu getu og geta óskað eftir aðstoð hans ef
með þarf.

Landsfundur
1. Landsfund skal halda einu sinni á ári. Þar skal kosið um hvort hreyfingin verði lögð niður, og nægja
tveir þriðju hlutar atkvæða til þess. Að öðru leyti setur framkvæmdastjóri dagskrána í samstarfi við
landsfundarnefnd hreyfingarinnar.

2. Landsfundur skal haldinn í september ár hvert. Landsfundur er löglegur ef til hans er sannanlega
boðað með sex vikna fyrirvara. Í landsfundarboði skal koma fram dagskrá fundar og breytingartillögur
á samþykktum þessum sem leggja á fyrir fundinn. Framkvæmdastjóri skal boða til landsfundar.
Landsfundur hefur æðsta vald í öllum málum Borgarahreyfingarinnar. Allir kjörgengir Íslendingar
hafa á landsfundi Borgarahreyfingarinnar auk seturéttar, málfrelsi, tillögurétt og kosningarétt.
Þessari grein má einungis breyta með einróma samþykki landsfundar.

3. Landsfund skal boða með tilkynningu á vefsíðu hreyfingarinnar, með tölvupósti á alla skráða
netfangalista á vegum hreyfingarinnar og með auglýsingu í að minnsta kosti einum útbreiddum
prentmiðli.

4. Stjórn Borgarhreyfingarinnar er kosin á landsfundi.

5. Landsfundur samþykkir fundarsköp og skal landsfundi og öðrum fundum Borgarahreyfingarinnar
stjórnað í samræmi við þau.

6. Dagskrá landsfundar skal vera:

1. Kosning fundarstjóra
2. Skýrsla stjórnar
3. Breytingar á samþykktum
4. Stjórnarkjör
5. Endurskoðaðir reikningar lagðir fram til samþykktar
6. Kjör tveggja skoðunarmanna reikninga
7. Önnur mál

7. Til aukalandsfundar skal boða óski tveir af fimm stjórnarmönnum þess, eða 7% af fjölda þeirra er
greiddu hreyfingunni atkvæði í undanfarandi alþingiskosningum. Aukalandsfundur er löglegur ef til
hans er sannanlega boðað með tveggja vikna fyrirvara.

Reglur um aukalandsfund eru samhljóða reglum um landsfund nema óheimilt er á aukalandsfundi að
breyta lögum þessum. Dagskrá landsfundar tekur breytingum eftir því til hvers hann er boðaður. Sé
aukalandsfundur boðaður vegna vantrauststillögu á stjórn skal skipta út liðnum “Stjórnarkjör” fyrir
liðinn “Vantrauststillaga á stjórn.”

Sé vantrauststillagan samþykkt skal haldinn aukalandsfundur að sex vikum liðnum til að kjósa nýja
stjórn.

8. Á landsfundi skulu kjörnir tveir fulltrúar í stjórn og tveir til vara til tveggja ára í senn.
Hver kjósandi skal skrifa nöfn fjögurra eða færri frambjóðenda til stjórnar á kjörseðil. Atkvæði skulu
talin fyrir opnum tjöldum. Þeir tveir sem hljóta flest atkvæði skulu teljast rétt kjörnir í stjórn. Næstu
tveir að atkvæðavægi taka sæti í varastjórn. Allir kosningabærir landsmenn geta gefið kost á sér til setu í stjórn.

Þinghópur
1. Hlutverk þingmanna er að vinna að stefnumálum Borgarahreyfingarinnar á Alþingi.

2. Í öllum málum skulu þingmenn vera í tengslum við þau grasrótaröfl sem hafa með viðkomandi
málaflokk að gera. Þingmenn skulu boða til opins fundar a.m.k. einu sinni í mánuði. Slíkir fundir
skulu einnig haldnir utan höfuðborgarsvæðisins þegar hægt er.

Starfsfólk
1. Framkvæmdastjóri skal ráðinn til að sjá um daglegan rekstur hreyfingarinnar auk annarra verkefna
sbr. starfslýsingu. Framkvæmdastjóri getur ráðið starfsmenn í samráði við stjórn. Allir trúnaðarmenn
hreyfingarinnar (stjórn og framkvæmdastjóri) skulu gera grein fyrir tengslum sínum við fólk sem
þiggur greiðslu frá hreyfingunni fyrir störf í hennar þágu.

2. Stjórn Borgarahreyfingarinnar skal semja við framkvæmdastjóra um laun sem skulu þó eigi vera
hærri en þrefaldur lægsti taxti ríkisstarfsmanna.

3. Framkvæmdarstjóri skal semja við annað starfsfólk um laun sem skulu þó eigi vera lægri en eins og
hálffaldur lægsti taxti ríkisstarfsmanna og ekki hærri en þrefaldur sami taxti.

Alþingiskosningar
1. Hlutverk frambjóðenda til alþingiskosninga er að koma stefnumálum hreyfingarinnar á framfæri
samkvæmt gildandi lögum um kosningar.

2. Kosningastjóri skal ráðinn á sama hátt og framkvæmdastjóri og eigi síðar en þremur mánuðum fyrir
alþingiskosningar. Stjórnin semur við kosningastjóra um laun sem skulu þó eigi vera hærri en
þrefaldur lægsti taxti ríkisstarfsmanna.

3. Allir kjörgengir íslendingar geta gefið kost á sér á framboðslista í hvaða kjördæmi sem er.
Framboðsfrestur rennur út átta vikum áður en skila þarf framboðslistum til kjörstjórna. Þegar
framboðsfrestur rennur út skal kosningastjóri kanna í hvaða kjördæmi og sæti frambjóðendur vilja bjóða sig fram og gera drög að framboðslista eftir þeirra óskum. Þessari grein má einungis breyta með
einróma samþykki landsfundar.

Eigi síðar en sjö vikum fyrir kosningar skal kosningastjóri boða til fundar sem ákveður endanlega
uppröðun framboðslistana. Í fundarboði skal koma fram dagskrá fundar og drög að framboðslistum. Á
fundinn skal boða alla á skráðum netfangalistum á vegum hreyfingarinnar og skal hann auglýstur á vef
hreyfingarinnar. Allir kjörgengir Íslendingar hafa þar auk seturéttar, málfrelsi, tillögurétt og
kosningarétt.

Við ákvörðun á uppröðun framboðslista skal fundurinn starfa í anda jafnræðis hvað varðar kyn, aldur
og búsetu. Ef alþingiskosningar bera brátt að má kosningastjóri í samráði við stjórn hliðra til
tímamörkum eins og nauðsyn krefur.

Þessari grein má einungis breyta með einróma samþykki landsfundar.

4. Dagskrá félagsfundar sem ákveður framboðslista skal vera:

1. Kosning fundarstjóra
2. Kynning á drögum framboðslista
3. Umræður um uppröðun framboðslista
4. Breytingar á framboðslistum
5. Kosning um framboðslista

Fjárreiður
1. Borgarahreyfinguna má ekki skuldsetja með lántökum. Þó má taka skammtímalán ef algerlega er
tryggt að tekjur hreyfingarinnar geti staðið undir því.

2. Framkvæmdastjóri Borgarahreyfingarinnar skal gera fjárhagsáætlun um nauðsynleg fjárútlát og
fjárskuldbindingar hreyfingarinnar á komandi almanaksári og bera undir stjórn. Tekið skal sérstaklega
fram að óheimilt er að nota fé hreyfingarinnar í nokkurs konar munað eða fríðindi.

3. Bókhald Borgarahreyfingarinnar skal vera opið öllum og sýna hverjir styrkja hreyfinguna. Öllu fé
Borgarahreyfingarinnar skal sannanlega varið í samræmi við tilgang hennar.

4. Þriðjungur af tekjum hreyfingarinnar á hverju ári skal settur í kosningasjóð.

5. Þeir sem fara með fjárreiður hreyfingarinnar skulu ávallt leita tilboða sem víðast. Öll fjárútlát og
fjárskuldbindingar, umfram upphæð sem miðast við mánaðalega húsaleigu hreyfingarinnar, þurfa
undirskrift framkvæmdastjóra og gjaldkera.

Félagsslit
1. Þegar tilgangi Borgarahreyfingarinnar er náð eða augljóst er að honum verði ekki náð mun
hreyfingin hætta starfsemi og hún lögð niður. Þessari grein má einungis breyta með einróma samþykki
landsfundar.

2. Ákvörðun um slit Borgarahreyfingarinnar verður tekin á landsfundi með atkvæðum a.m.k. 2/3 hluta
fundarmanna. Við slit hreyfingarinnar skal skila afgangsfé til þeirra sem lögðu fram fé tólf mánuði fyrir slit hennar í hlutfalli við framlög þeirra. Þessari grein má einungis breyta með einróma samþykki
landsfundar. Kosningasjóður skal allur fara til ríkissjóðs.

Lagabreytingar
1. Samþykktum Borgarahreyfingarinnar má aðeins breyta á landsfundi. Breytingartillaga telst samþykkt ef hún hlýtur 2/3 greiddra atkvæða á landsfundi nema annað sé tekið
fram í samþykktum þessum.

2. Allar tillögur til breytinga á lögum þessum skulu sendar til stjórnar eigi síðar en tveimur vikum
fyrir boðun landsfundar. Allir kjörgengir Íslendingar geta lagt fram breytingartillögur á samþykktum
þessum. Stjórn skal sannanlega birta breytingartillögurnar á vefsíðu hreyfingarinnar og með skeyti á
alla á skráðum netfangalistum á vegum hreyfingarinnar eigi síðar en sex vikum fyrir þann landsfund
sem þær skulu teknar fyrir á.

Borgarahreyfingin sem grasrótarafl

Ef háskólanemar færu á bætur....

..... mundi það vera mun dýrara fyrir ríkið en að leiðrétta námslánin. Fjöldi fólks fór í háskóla frekar en að skrá sig atvinnulaust, þó eflaust hefði það verið hagkvæmara fyrir námsmanninn.  Þetta eru jú lán, ekki bætur. En ég tek undir þessa grein því meðan allt hækkar þá gera lánin það ekki.  T.d. voru bókarkaup annarinnar (5 bækur) á rúmar 50þús kr. meðan bókastyrkurinn er 24þús. Þetta litla dæmis segir meira en mörg orð um skerðingu þá sem nemendur horfa nú uppá. Eins þurfa nemendur nú jafnvel að dreifa lánunum yfir heilt ár vegna tekjuleysis yfir sumarmánuðina.

Hvað ætla VG nú að gera? Halló Ráðherra?

Háskólanám forréttindi ríkra

Dásemdir ESB á silfurfati.

Nú jæja. Þannig að þetta er ESB undrið. Evrusvæðið virðist ekki vera sá draumur í dós sem margir hér vilja trúa. Ég er viss um að Norðmenn er ánægðir með þá ákvörðun sína að hafa haldið sig fjarri.

Meira að segja Nokia - sem er einn af stærstu framleiðendum gsm síma á alþjóðamarkaði virðist ekki duga til við að draga úr niðursveiflunni.

Ég hugsa að sennilega sé nú gamla góða krónan okkar betri kosturinn þrátt fyrir allt.  Við værum allavega ekki að sjá jákvæðan vöruskipta og þjónustujöfnuð að sama skapi og nú.

Mikið hefði nú tíma alþingis í sumar verið betur varið í að huga að stöðu fólksins hérna heima. Af hverju skyldi Jóhanna vera svona blinduð af ESB? Og afhverjur styður Steingrímur þessa vitleysu þvert á stefnu flokks síns?

Tja - það er nú augljósara með Steingrím - öðruvísi væri hann ekki í stjórn, en þetta með Jóhönnu er dulin ráðgáta. Hún er líka soldið spes........

Finnland í djúpri lægð

Utanaðkomandi stuðning hefði átt að fá strax í upphafi......

......vegna þess að ríkisstjórnin réð ekkert við málið fyrr - og ræður ekkert við það núna!

Til dæmis hefði kannski verið sniðugt að fá sérfræðinga í samningaviðræðum og samningagerð. Bara svona ábending.

Nú eða sérfrótt lögfræðiteymi. Nei - bara svona að spá.....

En auðvitað hefði verið best, að mati fjármálaráðherra, að samþykkja bölvaðan samninginn óbreyttan. Er það ekki - ha. Þá hefðum við ekki verið í algjörri upplausn.  Bara pínulítið meira gjaldþrota og pínulítið lengur.......

Annað sem nagar mig svolítið er þessi málsgrein "Fullvíst er talið að hafni Bretar og Hollendingar einhverjum tilteknum atriðum í fyrirvörunum verði reynt að leysa slík mál á fundum ráðherra landanna, hvort sem það verða fundir fjármálaráðherra eða forsætisráðherra."

Ætla þau að fara að skrifa uppá fleiri plögg sem setur svo Alþingi á hvolf við að reyna að hafna eða laga? Ég ætla rétt að leyfa mér að vona að þau geti ekki ein og sér og sjálf hnikað til þessum fyrirvörum. En þau geta auðvitað sett allt í klessu - aftur.

Steingrímur er nú orðinn nokkuð fær í því......

Duh - hvað ég er ekki að fíla þessa ríkisstjórn!

Upplausn hér verði Icesavelögum hafnað

Duglegur þinghópur í góðu sambandi við fólkið í landinu.

Ég fer oft inn á bloggið hjá Þór Saari. Þar getur maður meðtekið hvað er að gerast innan sala alþingis á mannamáli. Hann er fastur fyrir og fylgir eigin sannfæringu. Vel menntaður og veit hvað klukkan slær. Þær Margrét og Birgitta hafa einnig staðið sig með sóma og prýði. Eru líka fastar fyrir og láta ekki segja sér hvað þær eigi að segja. Þarna er fólk sem metur stöðuna, endurmetur hana þegar nýjir þættir koma í ljós og fara eftir eigin samvisku.

Þetta er vel í anda stjórnarskrár okkar þar sem stendur:

48. gr. Alþingismenn eru eingöngu bundnir við sannfæringu sína og eigi við neinar reglur frá kjósendum sínum.

Þetta er lýðræði. Alþingismenn eiga að fylgja sinni sannfæringu. Þeir hafa nýjustu upplýsingar um málefni og vita hvað fram fer innan Alþingis. Allt of margir alþingismenn hundsa eigin sannfæringu til að fylgja flokknum, styrkja stöðu sína í ríkisstjórn eða gagnvart kjósendum.

Ekkert þremenninganna hefur orðið uppvíst að þessu. Þau fylgja eigin sannfæringu og vinna verk sín vel. Ég hef heyrt til þeirra á þingi reyna að minna á vanda heimilanna þegar fjallað hefur verið um ESB eða Icesave. En því miður þá fá þau jú engu ráðið um dagskránna sem þar fer fram.

Stjórn Borgarahreyfingarinnar deildi harkalega á þingmennina vegna þess að þeir greiddu ekki atkvæði með aðildarviðræðum ESB. Þingmennirnir hinsvegar skýrðu afstöðu sína bæði fyrir hreyfingunni og almenning og gerðu það vel.  Ég er viss um að meirihluti þjóðarinnar var þeim sammála. En stjórnin vildi ráða - en fékk ekki.

Það var "Þjóðin á þing" ekki "Stjórn BH á þing"? Því þegar stjórn vill hafa allt vald á sínum höndum þá erum við ekki lengur að tala um lýðræði heldur flokksræði.

Með þessu framboði er þessi hópur, sem er hluti fyrri stjórnar sem hvað hæst lét, í raun að lýsa vantrausti á þingflokkinn. Reyndar ekki í fyrsta skipti en virðist nú vera full alvara að ná völdum innan hreyfingarinnar með lögum og skipuriti sem setur þingflokkin í skrúfstykki undir stjórn. Skipuritið sýnir það greinilega að þingflokkurinn skal heyra undir stjórn hreyfingarinnar í stað þess að vinna með henni. Það á að tryggja það að þingmenn hafi ekki sjálfstæða skoðun á málefnum þjóðarinna - þrátt fyrir að vera betur upplýstir hverju sinni.

Hvað er grasrótin?

Talað er um að BH vinni fyrir 14000 kjósendur.  Veit ekki hvað meðlimir BH - grasrótin - eru margir. Hve skyldu margir þeirra vera verulega virkir? Hversu mikið fylgjast þeir með þjóðmálunum? Eru skoðannir þeirra litaðar af reiði? Eru þeir vel upplýstir?

Hvernig á mislitur hópur fólks sem stjórnast af mismunandi tilfinningum, væntinum, upplýsingum og skoðunum að stjórna þinghóp? Það er - gott fólk - ekki gerandi. Aldrei hefur sést það skipurit í raunveruleikanum sem hefur 100 - 1200 stjórnendur og 4 menn sem fylgja fyrirskipununum.  Og hvað verða þessi 1200 lengi sammála? Nú eða þessi 12?

Árangur felst í samvinnu og trausti.

Hreyfing ætti að sýna þingmönnum sínum traust til að taka réttar ákvarðanir. Sýna þar með almenningi og kjósendum að bæði hreyfingunni og þingmönnunum sé treystandi. Vinna með þeim og útskýra afstöðu þeirra fyrir kjósendum gerist þess þörf. Það er samvinna og samstaða.

Stór hluti þjóðarinnar ber virðingu fyrir þessum fersku þingmönnum sem hafa virkilega látið til sín taka á þingi. Ef stjórn hreyfingarinnar með þessu móti gefur til kynna að hún treysti ekki þingmönnunum þá er ég hrædd um að þjóðin hætti að treysta hreyfingunni.

Þjóðin kaus þessa þingmenn. Ekki bara Borgarahreyfinguna!

Bjóða sig fram í stjórn Borgarahreyfingarinnar