Alþjóðagjaldeyrissjóðurinn again.

Í DV í dag má lesa grein þar sem AGS viðukennir tilstuðlan sína að falli Argentínu með því að heimta niðurskurði og vaxtahækkanir. Niðurskurðir sem þessir leiða af sér minni skatttekjur, atvinnuleysi og minni tiltrúnað á hagkerfinu. Kannast einhver við þetta? Anyone..

Að sögn Joseph Stiglitz er niðurskurður einmitt það sem á að forðast í djúpri efnahagskreppu. En AGS settu lánadrottna Argentínu - sem vildu sína peninga strax - í forgang fram yfir almenning. Almenningur missti því vinnuna og átti ekki fyrir fæði og húsnæði. Kannast einhver við þetta? Hmm

Á Íslandi í dag sitja stjórnvöld og rembast við að hlýða AGS - fyrir lánadrottnana erlendu, meðan almenningur er svikin, brotinn og vonlítill. 

En afhverju erum við í re-play hérna? Jú, Evrópusambandið á í vanda með að bjarga skuldugum löndum svæðisins (var ég ekki eitthvað að tala um þetta í fyrra bloggi - minnir það). Það eru einhver merkileg tengsl milli ESB og AGS - sem eru að gagnast okkur fremur illa.

Nú - þegar þessi kreppa númer II sem Evrópuríkin eiga von á brestur á af fullum krafti, hvar verðum við þá? Langt frá því að fá stuðning frá ESB trúi ég. En það er allt í lagi að fórna einu litlu sjóbörðu landi fyrir smá pening til handa stóru þjóðunum - er það ekki?

Málið er að ég er bara ekkert svo ánægð með þetta. Er ekki bara mál til komið að sparka AGS heim til sinna ESB landa og reyna innspýtingu í hagkerfið í stað niðurskurðar fram og til baka. Við getum unnið, Íslendingar, ef við bara fáum það.

Hvað segiði - erlendir lánadrottnar eða Íslenskur almenningur? Ha? Hvað finnst ykkur?

 

Vara við annarri kreppu

Kæru ESB sinnar - eat this!

Mikið ofboðslega er ég sammála þessum manni. Ég hef verið skotin niður og tuðuð í kaf vegna skoðanna minna á því að mismunandi hagkerfi kalli eftir mismunandi gjaldmiðli. Annað væri eins og að setja heildarflóru ávaxtafjölskyldunnar í einn pott og ætla að fá hreinan appelsínusafa.

Svo Þjóðverjar ættu að taka upp Þýska markið aftur. Hljómar mjög eðlilega í mínum eyrum.

Bloggari hjálpar AGS

Þessi grein ætti að lesast oft og vel!

"Þau brýnu frumvörp sem ekki hafa fengið afgreiðslu eru: Frumvarp um 4% þak á verðtryggingu, lyklafrumvarp, leiðrétting höfuðstóls lána, lög um gjaldþrotaskipti og fyrningu kröfuréttinda, lög um hópmálsóknir, lög um umboðsmann skuldara, lög um greiðsluaðlögun fasteignaveðkrafna, lög um greiðsluaðlögun einstaklinga.

Mörg þessara mála hafa verið þæfð eða svæfð og þvælt um nánast allt milli himins og jarðar annað en það sem skiptir þorra heimila mestu máli. Yfirlýsing forsætisráðherra um ágæti aðgerða stjórnvalda er nýjasta fjöðurin í skrúðgöngu fáránleikans." (tilvísun í greinina sjálfa)

Er einhver í vafa um það að almenningur þarf að rísa upp?

Óttast setningu bráðabirgðalaga

Eigum við að fjölga bekkjum við Austurvöll?

Meðan ríkisstjórnin situr inni í hlýju Alþingis og veltir því fyrir sér hvernig hún geti endalaust logið til um vanda heimilanna sitja heimilislausir á bekkjunum við Austurvöll.

Ríkið afskrifar eigin skuldir ef satt er að skuldir þess hafi lækkað frá því fyrir hrun, enda ekki hægt að komast öðruvísi í ESB.

Húsin okkar eru komin í eigu bankanna vegna óráðsíu þeirra sjálfra - annað hvort sem hækkuð skuld okkar aumingja fólksins (og þá aukin eign bankanna) eða hreinlega að bankinn hefur hirt húsnæðið á slikk, eða í þann veginn að gera það. Þetta er allt gott og blessað fyrir bankana sem hafa þá þessa fínu eignastöðu. Og ríkið sem er með burðugri banka. Og erlendu fjárfestana sem hirtu hlut í bönkunum vegna glæfrafjármennsku fyrri eigenda og sjóndepurð stjórnvalda á sama tíma.

En hvað græðir ríkið á þessu til framtíðar? Aukinn vanda spái ég. Ráðþrota vonlaust fjölskyldufólk flýr af landi ef það getur. Raðirnar fyrir framan hjálparstofnanir lengjast. Og fleiri setjast niður á bekkina við Austurvöll.

Það var gott mál hjá CreditInfo að gera þessa könnun og benda á vandann. Það er rétt hjá þeim að fólk þarfnast lausna - mismunandi lausna miðað við mismunandi stöðu. Og að stjórnvöld eru með puttana í eyrunum og augun klemmd saman tuðandi í sífellu um 50 aðgerðir, bla bla bla.

Stopp nú.

Ég ætla að endurtaka mig þar til ég - og þið verðið græn í framan.

Mögulegar lausnir!

1. Frysta lán þeirra sem eru eingöngu á bótum (sama um hverskonar bætur ræðir).

2. Uppreikna framfærsluviðmið bótaþega.

3. Hækka mæðra/feðra laun til einstæðra foreldra

4. Hækka barnabætur

5. Lengja frest vegna nauðungarsölu

6. Skoða og leiðrétta húsnæðislán

7. Lækka atvinnuhlutfall (ekki láglaunahópa) niður í 70% og gefa þar með fleirum tækifæri á að fara inná þann vinnumarkað sem þegar er til staðar.

8. Láta ekki bótaþega eða láglaunafólk greiða skatta af horlaununum/bótunum sem það fær.

9. Lyklafrumvarpið í gegn.

Þessi listi á sjálfsagt eftir að lengjast. Og þá gerir hann það. Og sjálfsagt mun ég endurtaka hann, jafnvel oft. Nógu oft til að einhver hlusti vonandi!

 

Sökkva í skuldafen

Og ef ekkert verður að gert þá fer talan uppí 60%

Það eru nokkrar lausnir mögulegar sem grípa þyrfti til strax.

1. Frysta lán þeirra sem eru eingöngu á bótum (sama um hverskonar bætur ræðir).

2. Uppreikna framfærsluviðmið bótaþega.

3. Hækka mæðra/feðra laun til einstæðra foreldra

4. Hækka barnabætur

5. Lengja frest vegna nauðungarsölu

6. Skoða og leiðrétta húsnæðislán

7. Lækka atvinnuhlutfall (ekki láglaunahópa) niður í 70% og gefa þar með fleirum tækifæri á að fara inná þann vinnumarkað sem þegar er til staðar.

8. Láta ekki bótaþega eða láglaunafólk greiða skatta af horlaununum/bótunum sem það fær.

 

Þetta eru allt mögulegar lausnir sem gætu komið í veg fyrir meiri skaða almennings. Skjaldborgin sem okkur var lofað var reist umhverfis bankana. Nú þarf að reisa skjaldborg heimilanna - og það strax.

 

30-40% heimila þurfa aðstoð

Hvernig væri þá að hækka fjármagnstekjuskatt tímabundið?

Ef hækka þarf skatta er þá ekki rétt að hækka þá hjá þeim sem hafa efni á því?

Að hækka skatta hjá þeim sem eru að reyna að fóta sig bæði á fyrirtækjamarkaði sem og almenningur gerir ekkert fyrir atvinnulífið. Það sem við þurfum er að atvinnulífið fari að blómstra á nýjan leik. 

Að mínu mati þarf að endurhugsa allt kerfið hérna að nýju með það að markmiði að fjölskyldur haldi velli, atvinnulífið blómstri og hjól hagkerfisins fari að snúast.

Ef það bitnar á þeim sem hafa efni á því - töff shit.

Segir ýtt undir atvinnuleysi

Þetta er alvarlegt mál sem verður að laga!

Þessar tölur munu bara aukast og afkoma fjölskyldna versna ef stjórnvöld sitja auðum höndum og tauta um lausnir sem greinilega eru ekki að koma að gagni.

Framfærsluútreikningar þeir sem byggt er á t.d. hjá bótafólki eru ævafornir og langt frá því að vera í takt við raunveruleikann. Atvinnuleysi margra einstaklinga gerir það að verkum að fólk sekkur æ neðar í skuldasúpu vegna þessa. Það sama á við um aðra bótaþega og þá sem eru á lægstu laununum. Fyrir þetta fólk eru engin raunveruleg úrræði - og það er skömm að því.

Eins ættu þeir sem eru í þessum hópi ekki að þurfa að borga skatta af allt of lágum bótum!

Það þarf að endurreikna framfærsluviðmið að nýju og frysta lán þess fólks sem er í verstu aðstöðunni þar til hjól atvinnulífsins vara að snúast að nýju.

Einnig þurfa stofnanir eins og LÍN að athuga aðkomu sína að þessum hópi, endurreikna framfærsluviðmið og gjaldfella ekki lán á einstaklinga í slæmri aðstöðu vegna aðstæðna í þjóðfélaginu.

Það er svo margt annað sem við má bæta og er algerlega og gjörsamlega framkvæmanlegt, s.s. hækkun á mæðra/feðralaunum. Hækkun barnabóta ofl.

Eins mætti hvetja atvinnurekendur til að bjóða frekar t.d. 70% stöðugildi svo fleiri eigi kost á því að komast á atvinnumarkaðinn. Þau fáu störf sem auglýst eru í flestum tilfellum "fullt starf".

Það er engum til góða og ríkisstjórn til skammar ef fleiri fjölskyldur fara á götuna og geta ekki séð fyrir sér og sínum. Hringrás fjármagns hér er ekki að skila sér á réttan hátt til að auka velferð og koma hjólum atvinnulífs í gang. Til þess þarf almenningur að geta lifað mannsæmandi lífi og neytt þeirrar vöru og þjónustu sem það þarf. Það má ekki gleyma því að slík neysla skilar sér líka í ríkiskassann í formi virðisaukaskatta og skatta frá fyrirtækjum. 

Oft er þörf en nú er nauðsyn. Almenningur verður að standa upp og spyrna við fótum!

 

Um 22 þúsund á vanskilaskrá

50 margvíslegar aðgerðir? Ertu að grínast? Og fyrir hverja?

Hvað segja þeir á vef ráðgjafastofu heimilana?

 "Samkvæmt lífskjararannsókn Hagstofu Íslands árið 2009 höfðu 7,1% heimila lent í vanskilum með húsnæðislán/leigu á undanförnum 12 mánuðum og 10,3% heimila höfðu lent í vanskilum með önnur lán á sama tímabili. Árið 2009 áttu 39% heimila erfitt með að ná endum saman og þar af sögðust 8,2% eiga mjög erfitt með það. 15% heimila töldu húsnæðiskostnað þunga byrði og svipað hlutfall heimila taldi greiðslubyrði annarra lána en húsnæðislána vera þunga. Tæp 30% heimila gátu í ársbyrjun 2009 ekki mætt óvæntum útgjöldum að upphæð 130 þúsund með þeim leiðum sem þau venjulega nýta til að standa undir útgjöldum."

Greiðslujöfnun tengd við greiðslujöfnunarvísitölu sem er vegin við launaþróun. En fólk þarf að hafa laun og borga. Greiðslujöfnun lækkar greiðslubyrgðina um 17%.

Sértæk skuldaaðlögun þar sem lántaki greiðir af skuldum eftir greiðslugetu. Sértæk skuldaaðlögun er ætluð einstaklingum í verulegum greiðsluvanda sem sýnt er að geti ekki staðið að fullu undir skuldbindingum sínum um fyrirsjáanlega framtíð.
Sértæk skuldaaðlögun kemur ekki til greina ef önnur og vægari úrræði duga til að leysa vandann. Gert er ráð fyrir sölu eigna umfram það sem nauðsynlegt er til venjulegs heimilishalds en miðað við að í lok skuldaaðlögunartímabilsins haldi lántakinn hóflegu íbúðarhúsnæði og einum bíl með viðráðanlegri greiðslubyrði. Ef lántaki stendur ekki við greiðslur í samræmi við gerðan samning um skuldaaðlögun geta kröfuhafar ákveðið að skuldaaðlögun falli niður.

Skuldaaðlögun. Skuldaaðlögun byggist á samkomulagi lánveitenda, þar á meðal fjármálafyrirtækja, lífeyrissjóða og Íbúðalánasjóðs. Sé lántaki með skuldir hjá öðrum aðilum þarf hann að leita samkomulags við þá um mögulega skuldaaðlögun. Einstaklingur sem leitar eftir skuldaaðlögun skal snúa sér beint til aðalviðskiptabanka síns (banka eða sparisjóðs) sem leiðir skuldaaðlögunarferlið og telst því umsjónaraðili. Með aðalviðskiptabanka er átt við þann banka eða sparisjóð þar sem viðkomandi er með launareikning sinn. EN skilyrði sem þarf að uppfylla er að lántaki eða maki hafi að jafnaði greiðslugetu til að greiða af lánum sem svara til amk 110% af markaðsvirði eigna. Sérstök tilfelli fá þó að greiða sem nemur 80% af markaðsvirði eigna. Síðan eru það samningar við lánastonanir sem eru mismunandi og fela ekki í sér almenna leiðréttingu og ekki sitja allir við sama borð.

 

Skuldaúrræðin eru ætluð til þess að létta greiðslubyrgðina tímabundið með ærnum tilkostnaði í formi vaxta og verðbóta. Þeir sem verða fyrir tekjumissi virðast þurfa að fara gjaldþrotaleiðina (sem fólki finnst ekki fýsilegur kostur) og fólk með millitekjur fær takmarkaðar lausnir. Eins eru ekki úrræði fyrir fólk sem ekki vill lengur eiga húsnæði sitt vegna flutninga, tekjumissis eða hjónaskilnaðar - þar vantar t.d. lyklafrumvarpið þar sem veð í eign er einungis tengt þeirri eign hvað sem fyrir hana fæst.

Hægt er að sækja um frest á nauðungarsölu í 3 mánuði í stað eins. Einnig getur fólk verið í leiguíbúð í 3 mánuði í stað eins.  Nú er farið að ganga í eignir fólks sem treysti á að ríkisstjórnin hefði lausnir handa þeim. 

LÍN gjaldfellir nú lán ef fólk sökum tekjumissis stendur ekki í skilum. Skatturinn er alltaf reiðubúinn til að fara í fjárnám þó svo upphæðirnar séu lágar. Og þetta sjáðu til er ríkið - þið sjálf!

Nei Jóhanna mín - þessar 50 aðgerðir (sem ég hef að vísu ekki fundið allar) eru fyrir ákveðna einstaklinga en stórir hópar eru útundan. Það er ekki Skjaldborg - eða lausn. Það er mismunun.

Fólk hefur varla ofaní sig og á. Neysla dregst saman í þjóðfélaginu sem þýðir að það er engin smurning fyrir atvinnulífið. Samneyslan dregst líka saman sem hefur sömu þýðingu. Með þessu áframhaldi munu hjól atvinnulífsins fara í þvílíkan hægagang að ekki þarf nema einn gír.

Úrlausnir fyrir heimilin er ekki bara nauðsyn fyrir heimilin. Hún er líka nauðsyn þess að fólk geti haldið áfram að neyta vöru og þjónustu. Og það er frumskilyrði fyrir því að atvinnulíf geti blómstrað hér að nýju. Þetta eru því ekki bara stærstu kosningaloforðssvik stjórnarinnar heldur þau afdrifaríkustu til nánustu framtíðar ef ekkert er að gert.

Ef stjórnin getur ekki gert betur en þetta - ætti hún nú barasta að taka sængina sína og fara eitthvað annað.

Hafa komið til móts við skuldavandann

Kauphöll Íslands er eitt að því sem leggja ætti niður!

Hvers vegna? Vegna þess að Íslenskur markaður er of smár til að halda úti eigin hlutabréfamarkaði. Það höfum við séð nú þegar.

Hvað gerir alvöru hlutabréfamakaður? Hann er gagnsær og það eru sérfræðingar sem vega og meta raunverðgildi hlutafélaga miðað við þær upplýsingar sem þeir hafa. Og stóra hlutabréfamarkaði er ekki auðvelt að "gabba" því upplýsingarnar eru fyrir hendi.

Hvað er stærsti þátturinn í því að hlutabréf á stórum gagnsæjum mörkupum hækka/lækka? Jú - það eru aðgerðir fyrirtækjanna og væntingar til þeirra. Fyrst og fremst er það stjórn fyrirtækja sem hefur með þessar væntingar að gera. Stjórnir fyrirtækja hérlendis hafa verið krosseignahald andskotans og þessvegna stjórnað væntingum og verði á hlutabréfum. Vegna smæðar okkar og eignarhalds hefur verið auðvelt að slá ryki í augu almennings.

Þetta er ekki svo auðvelt á hinum stóru mörkuðum. En þetta verður alltaf auðvelt hér - við erum bara of lítil þjóð til að standa í því að vera með eigin Kauphöll.

Til að tryggja öryggi hluthafa og halda við stjórnir fyrirtækja þarf að skrá þau á stóra markaði sem hafa strangar reglur hvað upplýsingar varðar. Því ættu Íslensk fyrirtæki að vera skráð á markað t.d. með hinum norðurlöndunum.

Nema auðvitað við viljum halda vitleysunni áfram!

Anyone?

Skráningu Haga frestað til hausts

Samvinna og lýðræði!

Ég tek hattinn ofan fyrir Jóni Gnarr og félögum. Þeir koma ekki úr villta spillta vestrinu eins og svo margir forverar þeirra. Þeir vilja breytingar - það viljum við öll. Og þeir þorðu að berjast fyrir því.

Ég hlakka til að sjá hvernig samvinna Besta flokksins verður við aðra flokka. Ég tel að Besti flokkurinn sé ekki kominn til að "berja á andstæðingnum" og vera á móti öllu - heldur frekar að efla samvinnu í þágu fólks. Vinna fyrir fólkið - allskonar fólk.

Á Íslandi hafa verið að rísa upp öfl sem hrópa eftir lýðræði, samvinnu og almannahag. Á Alþingi er Hreyfingin þetta afl. Í Reykjavík er það Besti flokkurinn og Reykjavíkurlistinn hefði komið sterkur inn. Svipaðir flokkar hafa komið fram í öðrum kjördæmum. Það sem þessi öfl hafa sameiginlegt er kallið eftir lýðræði, breytingum og almannahag. Sigrast á áratugalangri spillingu innan stjórnmála og tala tungu fólksins í landinu. 

Samvinna.

Þetta viljum við sjá í landspólitíkinni líka. Og nú er tækifærið til að rísa upp og krefjast úrbóta fyrir Íslendinga. Við höfum eitt nægum tíma í að spila eftir stjórnmálauppskriftum risanna handan hafsins. Við erum snillingar í spillingu og klíkuskap. Svo miklir snillingar að sjálfsagt verður okkar minnst í sögubókum framtíðar um aldir alda. Við skutum undan okkur lappirnar og nú er kominn tími til að læra af mistökum okkar og velja alvöru lýðræði. Vera sjálfstæð í alvöru. Taka eigin ákvarðanir sem sjálfstæð þjóð. Ekki skrumskæling pólitíkusa fortíðar. Horfa ekki á glataðar og úreltar fyrirmyndir gráðugra og valdafýsinna þjóða í kringum okkur.

Tækifærið er núna - látum það ekki fram hjá okkur fara.

Líkt og Rómverjar forðum, getum við orðið fyrirmynd nýrra tíma.

No guts no glory

Jón Gnarr verður borgarstjóri